2009-4
  「中國游戲工作委員會香港聯會有限公司」正式改名為「香港遊戲產業協會 Hong Kong Game Industry Association」。
 
2008-11
  協會策劃首屆「Hong Kong Online Game Show 2008」,大會邀請了香港特別行政區立法會議員(資訊科技界) 譚偉豪博士作主禮嘉賓,並由及香港生產力促進局(資訊科技部)總經理兼協會榮譽顧問容啟泰先生作致歡迎詞,在開幕前場外已有過千名玩家排隊等候,開幕後人潮更沖至各攤位搶購心愛遊戲產品。
 
2008-5
  協會策劃「香港遊戲界四川賑災大行動」,四川地震災禍後,重建工作刻不容緩!因此香港50間不同的遊戲公司首次破天荒合作,僅於14天內特別籌備了「香港遊戲界賑災大行動」,參加的遊戲公司分?網遊界及電視遊戲界別,而網遊運營商共捐了21套網遊虛網義賣,這合共1000份的虛擬道具吸引了近千玩家通宵排隊。
 
 
 
《譚偉豪議員對珠三角發展綱要數碼娛樂的意見》
 
主席先生:

《珠三角洲地區改革發展規劃綱要》絕對係對香港融入區域發展嘅重要文件,整個區域轉型係事在必行,而香港日後可以扮演乜嘢角色,係問題所在。我上個月係本會動議“推動本地創意產業發展”,我諗我地都希望,香港可以發展成為珠三角創意產業嘅龍頭,但如果政府唔去爭取、唔去做嘢,都幾難實現。所以,黃定光議員提出嘅動議,我係完全贊同嘅。香港要往前走,一定要同珠三角地區形成一個大嘅經濟圈,但係香港點樣同其他城市分工合作,就變得好重要,因此,特區政府應該盡快確定香港嘅定位,令到我地係珠三角發展中搵到我地嘅角色,咁香港先至可以發展新經濟,創造更多高增值嘅就業機遇。

我今次提出修訂,加入綱要裡面有關「數字珠江三角洲」嘅概念,令到香港同珠三角融合,修橋搭路固然重要,但係係知識型經濟中,實現資訊網絡嘅建設和互通,先至令到整個城市群產生更大嘅協同效應。綱要裡面所講嘅「數字」,即係香港人講嘅「數碼」,我地大家都好關注,點樣建立一個互聯互通嘅數碼平臺,同珠三角地區一起,推動數碼創意產業嘅發展。

綱要裡面指出,香港係珠三角通過合作,可以繼續為區域扮演國際金融中心嘅角色。除此金融體系嘅優勢之外,我覺得香港係資訊網絡上亦擁有絕對優勢,我地既有資訊自由,又有健全法制,知識產權又受到保護。我地擁有世界一流嘅電訊網,我地嘅數碼電視同埋IPTV(網絡電視)已經係三網合一,而珠三角規劃綱要雖然提到要落實電信網、互聯網和廣播電視網「三網融合」,但目前仍然係度規劃緊,香港係呢方面已經累積到唔少經驗和優勢。

究竟「數字珠三角」可以為香港提供乜嘢機遇呢?

1. 成為區域數碼娛樂媒體中心

數碼創意產業毫無疑問蘊藏著巨大嘅發展潛力,以美國為例,係iTune Store數碼唱片店流行之後,數碼音樂銷售額從2003年嘅2,000萬美元,上升到2007年嘅29億美元,係同期整個唱片銷售額所佔百分比亦由0%上升到15%,而且呢啲數值仲係持續上升。香港到而家都未能發展類似嘅iTune Store,係因為本地市場實在太細,如果能夠透過「數字珠三角」呢個平臺打入當地市場,就可以令我地嘅創意產業獲得更大的發展空間,鑒於電影、音樂都係本港創意產業嘅強項,我相信,香港絕對有條件成為珠三角區域嘅數碼娛樂媒體中心。

因為,香港係版權保護方面係亞洲做得唔錯,如果令兩地優勢互補,就可以形成一個巨大嘅平臺,進行視像、音樂等各種數碼娛樂內容嘅交易。當然,要令到業界嘅期望成為現實,特區政府亦應該爭取同內地商討,便利跨境網上付款同埋打擊網上侵權等問題。

2. 成為區域數碼出版中心

本來,香港傳統出版業如果要打入內地市場,係困難重重,因為一定要向內地同業買書號才有可能成事,但係,數碼出版和網絡文學係內地已有一定嘅發展,呢方面嘅限制亦較為寬鬆,如果透過「數字珠三角」平臺,香港就可以憑藉本身緊貼中外潮流文化嘅優勢,發展為珠三角區域數碼出版中心。

事實上,我係二月中旬同本地一啲業界朋友去過台灣考察,瞭解一下臺灣點樣推動創意產業。台灣數位出版聯盟嘅朋友亦同意,未來嘅創意產業,一定係朝著內容數碼化嘅方向走,而數位出版嘅發展範疇係相當廣泛,包括數碼出版典藏、數碼學習、數碼影音應用、數碼遊戲、電腦動畫等等,形成數碼內容嘅產業鏈。台灣業界朋友亦期望,透過台灣和香港業界係呢方面進一步合作,可以一齊發展內地市場。因此,有咗「數字珠三角」呢嗰平臺,香港實在係好有條件成為區域數碼出版中心。

3. 成為區域電子教育和培訓中心

香港嘅優勢之一,就係係大學教育方面,而隨著網上學習愈來愈流行,我地應致力於令香港成為珠三角區域電子教育和培訓中心,開拓電子教育市場,以促進珠三角地區知識經濟產業發展。同時,可以利用電子學習去培訓人才,推廣終身化電子教育學習,提高珠三角人才嘅競爭力。

業界朋友提議,如果能夠容許本地大專院校在珠三角開設虛擬大學課程,學生可以從網上學習取得部分學分,部分學分則到本港學習取得;咁樣做有助於結合虛擬大學模式,鞏固香港作為區域教育樞紐嘅地位。

但係,香港如果要成為珠三角區域嘅數碼娛樂媒體中心、數碼出版中心、電子教育和培訓中心,至少要在CEPA框架下做好兩件事:其一,要同內地合力建造一個優質的網絡平臺,為了讓兩地的數碼網絡可以順利融合,特區政府應該同廣東方面爭取,向香港電訊網絡商開放市場,讓我地業界可以參與當地電訊網絡。事實上,除了電訊網絡的融合,香港係數據網、Wifi網等方面,都應爭取與珠三角互聯互通。

其二,更重要嘅係,特區政府應該協助業界爭取,係廣東先試先行,容許香港的數碼內容可以進入內地,降低入場門檻,減少審查,例如,爭取盡快讓本港電視台取得廣東落地廣播權,放寬對香港ISP(互聯網服務供應商)嘅發牌,容許本港數碼出版和網上遊戲取得發行權,給予本港電子教育和培訓更大的空間,所有呢啲措施,都係為咗落實兩地嘅數碼多媒體內容互聯互通,促進數碼創意產業嘅發展,令香港可以向新經濟轉型,創造更多高增值嘅就業機會。

主席,我謹此陳辭。

IT譚工作坊
http://www.samsontam.hk/
 
 
[回首頁]